مروة عبد المنعم تبوح بأغرب مخاوفها على فيسبوك

كشفت الفنانة مروة عبد المنعم عن خوف غريب وطريف في الوقت نفسه، مشيرة إلى إنها  تعاني من "فوبيا التليفون"، أو بمعنى أدق "فوبيا المكالمات الصوتية"، واللي خلتها ما تردش على أي حد بيتصل بيها، وبتفضل ترد برسائل واتساب بس.

وفي بوست ساخر على صفحتها الرسمية على "فيسبوك"، قالت مروة: "بقالي سنة عندي فوبيا، ومكنتش واخدة بالي غير لما واحد قالي إنتي عمرك ما ردّيتي عليا في التليفون، لكن واتساب بتردي عادي!"، وأضافت: "ساعتها بس اكتشفت إني مبكلمش حد على التليفون.. حتى صوت الرنة بيضايقني.. لكن أول ما يجيلي واتساب برد فورًا!".

مروة ختمت كلامها برسالة محبة لمتابعيها: "فلو كلمتوني ومردّتش، ما تزعلوش، ابعتولي واتساب.. صباحكم خير وسعادة".

المثير إن بوست الفنانة شجّع متابعين كتير يشاركوا تجاربهم الغريبة مع المكالمات، منهم اللي قال إنه بيكره كمان الفويس نوت، وناس تانية أكدوا إن تليفوناتهم على وضع "صامت" من سنين، وكأنهم لقوا حد بيعبر عنهم!